小黑日記
個天才到此網頁
最近一次更新日期︰ 17/07/1999

第一輯．第二輯．第三輯．第四輯．第五輯．第六輯．第七輯．第八輯．第九輯．第十輯．第十一輯

14/07/99

曲中情

好喜歡一首舊歌，是郭小霖的「何故」。歌曲分四段，內容話若我的心是春夏秋冬天，妳就是當中的一切。可是又何故要離開男主角，讓他傷心欲絕。當時我想係中二啦， 覺得呢首歌係超正。將四季比作對舊情人的感情。可惜而家都好似無見過咁正o既歌。如果大家有咩好歌，不妨介紹比大家聽呀！

今晚去了西貢的一個地方叫做布袋澳吃晚飯。嘩先來一個豉椒炒聖子。隻隻又肥又大，又有鮑魚仔，花螺，扇貝，蟹，石班，超勁大瀨尿蝦，仲有海鮮炒飯，小菜幾碟， 連飲連食，每位都係百五蚊！不過我就無咩慾望食好o野，是但啦！餐餐有得食就算。但今次真係幾好。記住係發記呀，老闆幾好人！

連夜睇呢個女子世界盃總決賽。覺得好有共鳴。一來係中國以足球方面的最高榮譽賽事，二來又是與美國對戰。三是她們是女性。這幾方面我覺得最有看頭。開始時大家 都十分快，走全場。我知道這樣打法很快就會斷氣！下半場實在太慢，卒之我都訓了一陣！但差不多到完場的十五分鐘，我又精神起來了。看見她們都用盡了體力，背著 國家之名比賽，大家以精神力量比賽。加時期間大家都不讓對方有機會。在十二碼時間因一球之失輸了。但我內心卻對她們十分敬佩。因為實在太感動了。似乎勝敗都不 再重要。因為她們以經為國家全力以赴！真的十分值得敬重！好看！好似睇足球小將咁！

05/07/99

七月的一天

上個星期好開心可以去海洋公園玩番一日。又可以去睇大熊貓啦，珊瑚魚啦！仲有就係去玩海盜船！雖然係烈日當空，但因為心情因放假而輕鬆所以就算幾熱都頂得往！ 星期六我地又響塘咀室內打籃球啦！石塘咀室內運動場真係一個好值得懷念o既地方。我都有好多汗水同腦汁消耗o左響o個度。因為大概響六七年前我就成日響四樓個 自修室度自修，足有大半年時間。當然仲有二樓o個檔海南餐廳啦！

響石塘咀室內打波有莊毅啦，莊浩然，劉教練，馬程，梁之豪，十鴻，張偉，小黑同埋老坑。通通放飛機，而金魚佬就跟本唔知呢件事。當日大家都盡力以赴，其中又以 劉教練表現令人激賞。其中一場比賽，當劉教練一方以六分之差落後，八比十四時，大家都竭力在籃球架底下搶皮球，劉教練雖已筋疲力盡，但仍盡自己本身球員以入球為 本份，一步退到三分球線外，集中精神投射，卒之不負所望，追成十二比十四。可是球賽採取十五分勝負。只要敵方搶到皮球入波就可勝出。說時遲，那時快，敵方的莊毅運 用直線盤球，企圖攻取最後入球。嘿！劉教練豈是省油的燈？我方又再次成功搶截，忙不迭把球傳給劉教練。劉教練以靈巧身法，閃避敵方，在眾多隻手伸過來時刻 ——— 「劉．教．練．投．射．了」！ 入呀 ~！ 是一記清脆漂亮的三分投射！當時成績是十五比十四，把敵方氣出局！成為本週經典金球。劉教練順理成章成為眾人心中的 mvp (most valuable player)。劉教練果真是不負所望，難怪此稱號能成為城中經典！

26/06/99

跳舞毯

昨日同稀客肥森一齊去打波，馬程後來又到，我地一齊打o左一陣波已經熄燈。馬程專登借部 ps 比我，連埋跳舞毯。於是我即晚就帶返屋企玩啦！殊不知原來我呀媽都得o架！ 我呀媽雖然係慢o的，但佢第二次玩容易版本o既 "have you ever been mellow" 都有 d 成積！真係人不可貌相！我後來去o左沖涼，仲聽到門出面有跳舞聲！我呀媽仲話玩來玩去 都係得 d 唔開心！哈哈！希望我可以激勵我呀媽玩得勁o的啦！相反我老豆就無呢仲運動細胞啦！佢雖然係響以前跟過一位師傅學過武術好多年，但係原來佢聽拍子麻麻地！所以佢 一關都過唔到！但因為一張跳舞毯而拉近家人距離，呢個已經係遠超過人佢o既價值啦！
24/06/99

天才廣播劇接近完成啦！

今日早o的返屋企，整o左兩個幾鐘，將個「英雄一世的項羽」轉做 real 檔案。其實都好好玩o架！不過部電腦就有點吃力啦，條聲軌成 200mb 就算係開個檔案都成廿分鐘。 做o的剪貼就真係可以去煮個麵！不過為了廣大的朋友，花o的心機都無計啦！真係幾好玩o架！我單撈o左一個軟件，免費o既，可以做編輯。我就將條軌分成五個細檔，再將 o的錄音機開關o既啪啪聲剪o左，又將以前o的穿崩聲除o左佢。到而家都幾好。咪以為好易做呀，對住部龜慢電腦就會令人好氣餒！

今日去o左尖沙咀，新港中心樓下的機鋪，同以前的組女 wendy 同 rose 一齊玩跳舞機，呢部機都駛o左唔少錢啦。小黑，定性o的啦！雖然係幾好玩！好啦，整埋其餘o既檔案先！

22/06/99

好正呀！我係狙擊手！

今日經過旺角，行入去間機鋪，見佢出了一部新機，係模擬一個狙擊手去射敵人。好正呀！忍唔往玩了幾鋪。雖然係打唔嬴個大佬，但都比到我一個狙擊手的感覺。值得一玩o架！

o尋日話說我幫老闆個老婆整過部電腦，佢好感激我地所以專登請我地去食晚飯。o的鬼佬呢，好鬼鐘意食o的平常我地唔食o既o野，但佢地認為o個o的先係中國菜。今次去o左四川樓， 係響銅鑼灣。我都幾怕食呢o的飯局。雖然食餐飯，邊度都無所謂，但最慘係成個幾兩個鐘，大家都唔知講咩好。好彩我個supervisor 佢一人講十人的o野，相反我就只係坐響度聽。 其實講o個o的o野，咪又係公司o的o野！大家邊度有o野講o丫！

不過聽老闆話，雖然我份工好似斷斷續續咁，但有一份好大的科研費用，預埋我o個份，只要申請成功，我就唔駛好似而家咁提心吊膽啦。但願真係好似佢咁講，成功率好大啦！

09/06/99

有個小小的假期，好難得

今日下午請o左半日假，去o左做o的o野。我去o左葵興試o下o的數碼相機比人睇。大約係四點鐘已經完啦。好開心即刻約老友記 justin 去玩啦。佢剛剛無o野做，而佢又話 佢跳舞機好勁呀，咁就一定要出來玩o下見識一o下啦。真係好正！玩o個o的 maniac mode 都得！小黑就甘拜下風啦。佢仲可以轉又轉，玩花式呀，真係勁！我地響油麻地 食晚之飯，之後響大華virtual zone玩。成30幾人睇住，真係有o的驚！justin 就飄飄然啦，佢玩到嘛！我就想捐入去部機裹面啦！

其實小宦黑都唔係好想成日都玩。好似個人都了某個時間，自然就會想到應該係時候轉o下死性。講真份工作，自己都叫做不過不失，做得幾好咁樣。我自己就覺得個人其 他o野可以再改變一o下都係好事。但好玩的劣根性都係仲未可以改進。我想人係要不斷進步的。我個 supervisor 佢坐響屋企一日都會覺得自己浪費時間。小黑個人覺得佢 都有o的o野值得學習。如果我有佢咁自動自覺發奮自強，我就正啦！起碼對得住自己先啦。

個電腦芒壞o左呀，好慘。好想買一個新的但係又好貴……有無計諗呀！大家都想睇好網頁o架啦！不如大家夾錢比我啦……

01/06/99

這幾天太平凡

近十天沒有更新網頁啦，令到大家都好悶。真係唔好意思。響呢度交代一下近來的事情啦。上兩個星期主要都係出外工作。有一天我去了一間公司做培訓，朝九晚五。跟住兩 天下午去了元朗某地方，做些示範比人睇。發覺出外做o野時間好快過。咁又一天啦。跟住上個星期，日日都有o野整，好似幫個老闆整o下電腦，做o下海報咁，一日唔知點解 又過。再加上上兩個星期六全教會去了元朗旅行，我做了其中一架車的領隊。咁上個星期六晚呢，又去了釣墨魚。講起釣墨魚，又係客串做o下主持。而且駕船師傅話近來墨魚 因為天氣未到，所以無墨魚。隻船就係咁盪o下盪o下，支燈照響海上，見到一條條好似魚仔o既o野響海面轉轉o下，就同師傅九歲個仔，一齊釣佢上來。原來你一o的好似釣魚的 沙蟲類物體。不過個身就好腍。我同個細路響度勁釣呢o的蟲上來。算係釣唔到墨魚的另一種娛樂啦！仲有richard 讓比我部 LOMO 機呢！好正wor! 我成日拿上手玩，好 開心o丫！

今晚同劉教練，馬程同一蚊去玩跳舞機，好倦呀！連玩三舖，對腳都差o的抽筋！ 走時sam 又比o左本 "頭文字d" 比我。呢本漫畫畫車好靚！比賽好有節奏感！真係好睇！

我又想響呢度多謝一o的人。細佬anne五月卅日生日快樂！仲有wendy-christine，多謝你的關心慰問。希望德仔都對你好好啦！下次得閒記得請我飲o野wor! 仲有 vicky 啦，你 比我撞見同 william 拍拖啦，祝你永遠都開心快樂啦！ 仲有呀 mike。收到你的 email 我好感動！希望可以快o的見到你啦！我有兩個朋友下期讀 javascript 啦，射住佢地啦！ 我就睇o下有無o野好讀，先會報名的。

如果邊位朋友，你剛剛係第1000個參觀我網頁o既，就記得比個 email 我！我有一份禮物比你o架！呀，仲有，呢幾日好曬！

20/05/99

三天兩夜台灣遊記之一

響留言簿度見到 puffin 叫我寫o下一o的台灣遊記。其實我都打算寫番一o的o野。不過我又諗唔到整響邊一度。小黑日記係打算寫一o的心底感覺﹐同埋即日發生一o的事情； 開一個新專欄又會整到我個網頁好難管理……所以或者我會分一個部份出來專整一o的特別o野，咁我諗管理會容易一o的。所以一個網頁管理員唔易做o架！大家要為小黑打 o下氣，鼓勵o下我呀！

呢一個星期好疲倦，成日訓過籠，可能去完台灣，返到香港有個心理作用唔想做o野o掛？希望自己可以快o的捱過呢個低潮期啦！

13/05/99

跳舞機二之仲o區電！

話說我返來香港後，有一晚比手信比人，同佢去玩/ 睇人玩跳舞機啦，真係跳到小腿抽筋！後來我地響度睇人跳啦，有兩個後生仔，一個剪箭豬頭，紅色 t 恤同軍衭，另一個就 普普通通一個男仔。先係o個個紅衣人上去，佢選了最易的一首歌，o的節奏一起，嘩！嚇死人！動作大到會踢親人，手舞足蹈，但係 —— 完全唔優美不特止，仲令人感到可笑！ 一直以為只有少數人會有狂熱表演慾，原來香港地係咁多o既！早知係咁我推佢去選港男啦！

相反另一個朋友，玩難度高的程度仍然好從容。雖然優美就算不得，起碼唔似上次o個個上半身唔郁的人……所以人真係不可貌相。

台灣都幾好玩，仍然係好多o野食。而家o個度好興珍珠奶茶 500毫升裝，價錢都係 25 台幣。換番港紙係 6 蚊！真係飲到我傻！實在太抵！而且今次我地去了一個地方叫淡水， 係一個河口，日落西山時太陽會在海邊慢慢沉落去，好靚！可惜因為飛機餐食冷麵，個肚仔成日唔舒服，無心機食o野…真希望o的相會好靚啦！下一次應該會上傳比大家睇啦。

13/05/99

電腦展 + 跳舞機

今日係電腦展第一日。有公司寄邀請咭比我，上年我又有去，咁，無理由今年唔去架！所以入去睇睇。基本上同上年無咩分別。好似仲 少o左o野派 tim! 成個場有一半係做大客生意。今年咁多電腦雜誌出，所以比上年多o左雜誌單位。仲有，好鬼多公司都現場買巫毒3 咭。 代理商用o的盒砌成幅牆，幾壯觀呀！但真係無o野特別，如果用錢入場真係諗o下先……

之後我地去o左打機。今次玩o左三次跳舞機。初時真係幾緊張，隻腳唔知點跳好，但係玩到第三次已經可以好開放，玩到彈彈o下！真 係幾得意！我地仲見到有一個人，個頭向住個畫面，但係下身就不停咁扭！無錯佢真係好鬼勁，玩高級程度都掂，但係就好明顯佢唔係 好自然，好似上下半身分開運行咁。更恐怖係佢玩完一版例牌擰轉身向往佢個朋友笑，好似好招積咁。o區電！

得閒再玩過！

12/05/99

魏晉南北朝之宴

昨天晚上去左食日式部飛，同咩人去呢？係同魏晉南北朝o的人去。魏晉南北朝係中四時 A 班的一班人。距離而家都差不多成九年啦， 大家都各有路向。姨媽媽萬淑芬已經結婚生女啦，細佬馮雅詩係一個老師，細佬 anne　又會響 polyu 今年畢業。呀芬同輝輝就無變， 都係傻o下傻o下，呀 sam 就變晒型啦唔駛講。不過呢o的都係大家成長的階段。畢竟都成差不多十年時間。而且大家又係由中學到就業呢 段時間，所以真係幾唏噓……我諗他日大家繳晒師奶大叔o個陣時，仲更唏噓呀。

好似細佬 anne 咁，佢細個時讀書麻麻地，但係經過佢苦心努力，而家都大學畢業。所以話有恆心任何事都可以達到。但係佢對佢家姐我都 幾好o丫？以前年年都有一張聖誕咭寄比我o架，雖然係得兩行潦草到死的字，但總算係一番心意… 姨媽媽就真係好錫我。響我以前好無心 機時，佢成日放工都陪我，又話佢搵錢我未搵錢，成日請我食飯。我地又試過一齊坐響灣仔會展傾計唱歌。佢聽我的故事，我聽佢的故事。 不過呢o的又係多年前的事咯！

今個星期五六日會同 sam 同埋我同事 maria，一蚊同一蚊同事去台北。點解去完又去？因為去那裡又平，又多特別o野，三天時間可以好 輕鬆。大家講國語都 ok，而且那邊的人情很好，對遊客很友善，又健談。所以我都喜歡那裡。希望有多些時間可以去更遠，好似那些山路 火車呀，南部呀咁。有時諗o下我地香港都有很多人來旅遊，但我地點對外地遊客真係自己知自己事。唔似得人地咁好客。又或者似莊毅咁 welcome to hong kong.......

明天可以去電腦展，好開心。希望可以大開眼界啦！

04/05/99

小黑網頁未來新攪作

近來個網頁人數都有上升。可能係響世紀之戰個一日我叫大家來睇o下我個網頁所以多o的人啦。但同我想像之中仲係差少少。 講真版面或者設計我都可以再好o的。但係我多年上網心得，人地來睇絕大部份係想睇o的料，而唔係設計。所以我用o左對我來 講易做又快o既方法，求其咁用到就算的網頁。事實上真係咁。所以又一次證明小黑係不折不扣的天才……

我的意念之中，會整o的咩o野新攪作呢？呢排玩緊個 tekram 紅外線收發器入歌仔。如果我成功，我會 step by step 咁整一頁， 叫大家都玩o下。此外，我又會將個天才廣播劇上載啦，衰仔我部機個 cd-da extractor 入錯o左個 serial no. 攪到死o左，唔 能夠 convert 條 cd track 做 生 .wav 再用 real producer 做 real 檔。所以當屋企個 LAN 起o左，我就用第二部機做。此外， 我又想大家比o的相我，等我 upload 大家o的相上來。我又叫o左o的人得閒寫o下週記日記，然後比我加落個新的題目「朋友日記」 度。又想整一個 「我們的少年大事表」，將大家近呢十幾年的記憶集合，組成一幅公元2000年前，我們的少年記憶。會幾有意思o架！

唔知大家對小黑呢幾個提議點呢？希望大家都貢獻，互動，將小黑網做大佢，如果你o地有意見，希望你o地將意見放響留言簿度，我 會日日睇o架！多謝晒大家的意見先。

另外，我想多謝一個人，呢個人我都唔知識唔識佢，但肯定佢有visit我個網頁，佢無聲咁替小黑申請了 xiaohei@hongkong.com 同 xiaohei@china.com。 希望係都留番一言半語響留言冊度，等大家都多謝你一聲。至於我小黑，我衷心的多謝你！ ifvuh@hongkong.com 朋友！

30/04/99

剝牙記

佢叫我上午去照 x 光，五月12號去剝牙。但因為14號同劉教練去台灣， 所以打算遲些才去剝牙。咁我就同姑娘講啦，點知佢話今日下午就有個空位啦，做唔做o丫？ 咁無理由推o架？早兩日痛到我死，不如引刀成一快啦。於是應承o左。點知一照完 x 光之後， 成成日個人都無晒心機，做o左無心機的小黑。慘到無輪。食飯都係求其食。時間越近三點半， 人就越緊張。率之，訓響椅上，醫生一手打o左兩支針響大牙肉上。都無o野。因為o的肉好厚， 但第三支針，佢打響口腔上面好薄的肉上，嘩！我覺得支針響牙肉同骨之間擦過，醫生一打針， o的牙肉好像吹氣球咁漲起，跟住醫生行開o左，佢話要等o的藥發作。響呢個時候，姑娘佢比一張 紙我睇，大約係話剝牙之後的四天要注意咩o野。佢問我明唔明白。梗明啦！要佢讀一次比我 聽，好似行刑之前宣讀判詞咁。李育輝都企唔穩啦！跟住醫生來啦，佢放一舊咬牙膠響我口， 叫我咬住，然後佢做佢o野啦。佢用一支好細的鑽，鑽開我隻牙。跟住整爆佢拿出來。姑娘一早 話我知隻衰o野o的牙齦生到勾住骨，好鬼麻煩。但即使牙醫佢整爛隻牙都拿唔到。佢用隻鉗死 命撬都拿不出，要鑽多幾次。率之比佢拿出來。但係就變成三四舊碎片。之後輪到上面個隻（！） 因為佢話下面都已不存左，上面o個隻仲要來做咩呢？所以又要剝埋佢。但今次好快。醫生用一支 工具鉗住隻衰o野，然後講「忍住呀！」跟住隻手一扭，一拔，原隻拔出。跟住醫生又縫針啦，睇見 支針連線出入我個口幾次，但係就唔覺痛。可憐小黑出來時，變成了史泰龍 — 塊面無晒反應。 回家時流口水都唔知。今日仲要sick leave 呀！留響屋企無o野做。但個口又痛。昨晚起了幾次 身，飲清水，解下痛楚。唉，原來剝牙係咁痛o既。希望右邊大牙生性o的啦，唔好有事就好啦……
28/04/99

失戀的人；失戀故事

今天早上坐970巴士返工，看到一個熟悉的女子。她跟我常常坐同一班車，只是今天我們面對面坐。我發現她今天整天向著窗， 用紙巾拭淚，隱約還有點索鼻水聲。這個景況告訴我她或許是失戀了，坐車時又想起了以前的男朋友……

每一個人總有一種應付失戀的辦法。我認識一位朋友，他喜歡在飲完熱檸檬茶之後，把整片檸檬吃掉。起初只是以為他喜 歡吃酸的檸檬。有一天，他對我透露了真相。那次的失戀傷害了他太深，他於是每次喝熱檸檬茶之後都把檸檬咬爛吃掉， 為的是記得有這一次傷痕，一次比吃一生酸檸檬更酸的經歷。我覺得，這樣的一個紀念方法，也是男子漢的一種柔情。男子 總是要在人前裝成一個堅強無比的鐵人，可是男孩子的心比女性更感性。中五時一個同學失戀了，我和幾個朋友陪伴他到 淺水灣。就在那石柱上，他將自己拳頭狠狠的狂抽，拳頭打個稀爛，但我知他的心比那拳頭更痛。

所以我覺得失戀是痛苦的，是比肉體的痛楚更甚。但我的經驗告訴我，有一樣東西能醫治失戀 — 時間的沖刷。雖然是漫長 而且持久，但當這天站在對岸，笑著向你揮手時，你也會只有用一笑來告訴自己當初是那麼傻。失戀，只是人生的小挫折吧！

明天照牙 x 光，這個月又破產啦，脫牙要700蚊，真係剝又痛，唔剝又痛咯！

18/04/99

最近比較忙

最近忙得要命！幾個星期六都要工作！一個星期飛快地渡過。好像星期日都沒有，星期六之後就星期一咁。做o野又無心機啦， 搭車一定眼訓，一坐得耐就會覺得頭漲漲咁……幾想可以一連兩日訓響床上，無人可以搵到我。不過都好難啦。而家做多額外 咁多o野，又差不多上晒手，好快就會好o的啦。這是我自己安慰自己的說話。唉，連陪下女朋友都無時間，我就快變成人肉機器 啦……見字留o下留言比我安慰o下小黑啦！

不過話時話，星期四上那套九九年香港電影節開幕片「千言萬語」我都抽時間睇o下。我覺得套o野真係千言萬語，無心機都會 miss o左o的精彩對白。但係導演太過想將佢想講的o野講出o黎，令到套o野共鳴太少。李孋珍個角色可以再深入o的，同呀謝君豪 及那個賓佬的關係可以再加多兩分錢材料。而且講社會行動，唔係太多人有共鳴。但演員心機夠，又唔搶戲，算係幾好。不過一蚊 就牙痛咁聲，成日嗌悶。我就好專心諗o下o的對白。有時係幾精警o架！

運續兩日響大學見到謀利。佢個人都無變，仲係咁謀利。希望下一次見到佢會正經d啦。等你第日做經濟分析員照住我o架！

另外，大佬sam已經整好o左我地中三個隻天才廣播劇。一等我有心機就會打埋剩餘的台詞。到時大家要o黎聽呀~!

03/04/99

昨天晚上我夢見了妳…

昨天晚上我夢見了妳……妳好嗎？好像很久以來，我都沒法跟妳說上半句內心話。昨天晚上，在夢境之中， 我很高興我終於能將內心想對你講的話傾巢而出。雖然那只是夢中，但我已感到那莫名的舒暢。只是夢醒之 時，有一點惘然若失的感覺。記得上一次，我們偶然在時代廣場遇見。我那說之不盡的話，令你的男朋友站 在一旁吃悶羹。其實我只是想問候一下，要知道你的近況，好叫我相信你一直都是十分的享受每一天的生活。 你留給我的傳呼機號碼，我將我所有的聯絡方法都留給你了，只是沒有你的回音。唔……我想也是恰當的，至 少我不必會像遇見你般，措辭不善胡亂去講話吧！或許我真的只想，你在另一個生活空間，是十分的快樂， 以至將妳那深深的傷痕都磨滅去了。也許只有這樣，才叫我心中有一個很好的理由，叫我不再去想當初跟妳 一起的話會是多美好……

「今天生活似寫意，我也似忘掉往事。妳那影子褪出了，誰人知，在我心中的愛意？」

19/03/99

又係咁過了半個月

而家除o左原來份工之外，仲做緊part-time 野。自己成個人都好忙。因為響 99年新年時，自己對自己許下願望，希望可以儲到一點錢，將來好打算。心 想自己都成廿幾歲，好似都仲未試過為o左一件事咁有目標的做一件事情。 我自己都覺得我一世仔都幾好運，雖然唔係生活豐富，但都算係過得去。讀 書又唔係好勤力，又有得讀咁多書。好似無mud要求，但往往都係令我滿足。 我覺得無形之中，自己有一種好似係好幸運的感覺，反而令人無o左一仲向上的 動力。所以我覺得，以後可能辛苦一點，但總得要自己去學習上一代香港人靠 自己的努力享成果的歷程。

成日同 bibi icq，大家都互相鼓勵大家，要努力，希望大家都能在自己的努力 方向上有成果。唯願我地老友們都可以努力，面對咁難的生活啦。知足而常樂 ，耕耘而有成，是做人的定理。諗起許冠傑的一首歌「搵o野做」，真係一d 都 無錯的。

03/03/99

幾分傷心幾分痴

王傑係影響我少年時代最深的一個歌手。可能有o的人唔識佢。但響我中二三， 少年腦中充滿都係愛情幻想的時代，他的歌曲可以令我了解多一些何謂愛情。 他的歌曲好幽怨，好淒美的歌詞。十分喜愛他的第一隻廣東碟「故事的角色」， 十首歌除了一首「人去房空」之外，全部都是我喜歡的。

其實那人不多情呢？我對愛情有很多幻想︰我的女朋友要這樣那樣，我要帶她到 這裡那裡，我要這樣怎樣待她……一切美好的幻想都充滿我的少年腦袋。中二三 時，每晚都聽著電台節目「嘉寶十一點」、「留給最愛的說話」…每晚總要播一 首王傑的歌。我從歌詞才會意識到，原來愛情總都不是個個完美的結局。「分離 從來不易」、「情與愛何幼稚」、「若是熱烈地愛多一次，放棄原來更易…」、 「愛裡欠缺了真愛，再也沒意思」、「當初那個我從今不再痴」。沒有王傑的 歌，我沒有上這樣的一課。

數年前，一心要找回那段回憶，買了「故事的角色」的 CD 回來，欣喜若狂。一放 入唱盤，奏出那首首的歌曲和熟悉的歌詞，淚水險沒悄悄掉出眼眶︰我回到了那段 時光，我回到了我溜得最快的光陰。那時我拿著的是錄音帶，今天的是唱碟；那時 是無牽無掛的日子，今天是負起家庭經濟的一員；那時是火紅的一九八九年，今天 是灰褐的一九九九……

我想在這後現代，人能多活十載八載，遠不如能夠回到從前曾經的日子。多想， 發明一部時光機，回去輔導一下十二三歲強說愁的小黑！

01/03/99

小黑捽碟的艷遇...woowoo~!

今晚，我在旺角遇到了一個很靚的女仔，後來仲同佢一齊玩 BM 捽碟機，BEATMANIA。 話說我今晚開會食飯，回家歸途去近我回家小巴站的遊戲機鋪玩我最近很沉迷的捽碟狂 熱 BEATMANIA。我都玩得幾勁下架，我都去到最後一關，平常都有很多人站在我 背後睇的。今天我去玩，想試下單手控制鍵盤，仲要用左手！仲要玩平時都覺得很難的 歌！仲要玩一首很新但很難的 J-Techo，雖然係第二排三粒星，但我都覺得有四粒以上 的難度。所以通常玩到第四版的我今天玩到第二版就玩完。當玩到檯上的一蚊就快用完 時，有一個女仔跟機。我向後一望。很快地看一眼，我以為係鍾麗提！她是高個子的， 有著我一向偏愛的長直髮。自然令我心裡暗忖︰「靚女！」可是，不多久，這女孩子 又唔跟機，走左去了。此時，我的一蚊都散盡。但我都仲係玩唔完第二排就死掉了。我 當然心有不甘。平日咁勁的我無理由咁渣嘛！於是我走去後面的唱錢部，再唱一戙去打 過。當我回去時，剛才那女孩子又出現。這次，她正好坐在部機前，準備入錢。

由於我的 continune 畫面還未完，我開口對她說要求雙打。心裡想反正我地如果玩對戰 模式，大家都影響不了對方。此時，我卒之看真這位靚女的真面目︰她樣子並不似鍾麗提， 反而有八成幾九成似 one2free 跟金成武合作的那個日本妹。沒有化妝的她，反而有 點純樸。她跟我說「好呀好呀！我係唔識識打的」說時並用手比劃一部 gameboy 的形 狀說「我剩係響屋企玩呢隻捽碟機咋……」然後一路響度笑。是但啦。佢竟然continune 畫面還未完時就按了開始掣。於是我告訴她「你按錯啦，你自己玩先啦。」原來她真是 唔識玩的。一路玩一路尖叫，一時又放開晒手，掩面而笑。我坐響度看忍不了手，代她 玩了。最後都是死左。

我地再玩一鋪。問她想玩甚麼歌曲，她只管笑，說「我未玩過街機架！係揀些好聽的啦」 「你屋企無 play station 咩？」「有呀！不過無個個個盤」。說時又比劃著那個盤的大小 給我看。「好平咋！三百蚊度啦！」。玩到難的時侯，她又掩面笑，放開手又不玩。我叫她 唔好放棄，玩啦，她又說好難玩。「哈哈！我同你差咁遠！哈哈！」最後，她死了，坐看著 我玩完那鋪之後，無聲地走開了。

我再玩了二鋪，之後也走了。我看到她坐在我隔兩部機的旁邊，跟一個男子玩估錯處。那時， 我才想到，一個如此的靚女真的無理由一個人來。她不懂打機，顯然不會是常常混在機鋪的 女仔。一定是跟朋友來的。如果是跟女孩子來，一定也是一群的行動，互相保護。好彩她的 朋友沒有走過來。不然大家一定發現小黑網頁三個月都沒有更新……況且，靚女呢樣野，傾下 講下但求心情愉快。幻想世界始終都要夢醒的……唉，明天又番工啦！

一蚊看到以上內容唔好找我悔氣啦！我一早跟你報告了，而家我寫低等我回憶下咋……

21/02/99

Smile Again....瑪利亞

今日去太古城拜年, 手抽著一袋許留山的芒果布甸家庭裝, 在街上急著走. 對面的女孩 看過來, 看過來, 看過來. 但係個樣好面善. 原來係我地中七的班主任 miss Lam! 我心 裡忐忑的輕叫一聲 miss lam, 佢仲記得我小黑個名! 大家相對而立, 講o下近況, 仲趕 走佢父母 tim. 唉, 當年仲係師生, 而家係同門師兄弟, 真係好快. 都足足5年時光啦, 想起心中都有點惘然時光不留人...

當年真係比我地呢班學生玩死的miss lam 風采不減當年, 仲增添些少成熟美tim. 佢o係 剛畢業就來我地個間夕陽中學教我o地, 同我地都好 friend 架. 其實我都唔瞞大家, 我 中七對 chemistry 都好有心機讀o架. 我仲以為以我當時的走勢, chemistry 會最高分 tim. 卒之....到o左而家, miss lam d 筆記仲放響我個櫃度, 成套全o架. 我心裡好欣賞 miss 對我地 d 教學熱誠. 她的筆記係好正的, 令我好有心機讀. 我仲記得佢講過 d benzene o野 好似 d benzene ring 好吸光, 故此 d 2,4-dinitrophenyl hydrazine 通常都有鮮艷的顏色. 可能而家來講呢 d o野好似無用, 但當年我真係心心暗自佩服她的學識 (同美貌!)....

大家都改變了. 人大了, 就會發現轉變了的對方有著以往你期待著她擁有的得質, 有著你 期望以外的優點. 只是, 你跟她的關係也改變了. 大家相對而笑, 談著往昔的日子的時候, 我知道, 那是一種苦笑. (扮緊張小嫺的黃小黑 -- 有無 feel?)

加插了中七的照片, 請去小黑的私．相簿自己睇.

15/02/99

我的情人~~~woowoo~~~

嘩, 今個星期日一早返家執o野...因 為明天就係年卅啦, 我仲未清理完我張檯，唔 好講話我張床啦! 簡直係與書同眠. 睇番日記, 原來我都有成半個月未寫過野, 卒 之我原本想清理我張床, 最後去o左更新網頁啦....都係一件好事o既...

最近上o左網, 換了一部scanner, 好開心可以整晒我心愛的相上去, 睇番以前的相簿, 比我找回失落了的記憶...係我的情人呀~~! 想當年, 我響中六七時, 她剛剛出了 隻新歌叫 "多情" 響卡啦ok 睇住那個 mtv, 好感動想喊, 當正佢唱比我聽咁... "就在這一刻開始傾出內心暖意, 懇請你會對我真情無異" "情人你會對我如何重 要, 又會是比這短短一生重要" 這幅相是我一個女同學比我的, 她去電視台映相, 送 了給我, 我就留到而家了. 她那刻的樣子是我最喜歡的. 雖然她現在變了很多, 但我永遠都將你放響心o架! 情人節祝你沒有我都快樂啦....

28/01/99

好事多為...

今日做左一件事衰o左.. 事關早幾日有一個教授叫我幫佢做一件事, 將一 d 相造成 一份 printout 以作出學刊用途. 但係佢欠一張關於 98年 4 月紅潮殺死全港養魚 的相. 剛巧響硬碟有一大堆呢 d 相, 咁我就拿來用, 仲叫佢問番個學生拿番個 剪 報的日期同打埋出處, 因為人地問起版權都好麻煩. 我以為咁就無事. 點知今早件 事比剪報的學生的 supervsior 知道, 佢覺得唔單只要比出處同鳴謝, 正路應該寫 信去報館先得. 我覺得響呢件事上, 我做得唔係咁成熟. 因為我大求其拿了別人的 收藏去比別人, 此外我又無好好交代一下. 雖然而家份 paper 都未出, 仲可以改下 或者索性唔用, 但始終, 我覺得自己好似要錯左先曉改正. 唔可以未錯之前就做好 d. 雖然我可以讓自己過得去, 但我覺得我都要對自己有一個高要求. 唔好成日犯 呢 d 雞毛蒜皮的小事. 希望做朋友 o既你地可以比 d 提醒, 自己都要醒少少, 免 得我以為自己好聰明, 卒之好事多為唉...... 無 mood.

Bibi, 希望你明白我地大家都係關心你, 唔好怪我婆仔先得架. 記住星期三的飯 聚呀. 希望我記得帶 d 相比你睇啦. 馬程, 等你打 fifa 等到我心碎.....

25/01/99

如何用winamp?


winamp功能表

以上係winamp的大部份功能表. 最主要是那個 playlist 如何增減歌曲. 我本人建議 自己將所有 *.mp3 file 放進同一個 file folder 之內, 再以 "+ dir" 功能, 去 加減歌曲. 我就命名一個叫 "songz" 的 folder, 放晒 d 歌入去, 咁就方便管理 啦!


在winamp中增加歌曲
22/01/99

真事一則

今天病了無 mood 寫o野將今早聽到的一件事寫比大家睇...

小黑: A....笨小孩跟一般聰明的小孩有甚麼分別呀?

路人甲: 當然有分別啦! 笨小孩指著地圖中 "Sai Kung Long Kaer" 會同媽咪講係西貢浪茄, 聰明的小孩會問媽咪: "點解西貢呢個地方有長o既屎 (Long Kaer) o既?!"

小黑: 哈....哈....哈....哈....哈....

21/01/99

小 greg 失戀了

我對面的同事小 greg 失戀了. 聽說他今次的對象是一個非常非常之 "正" 的女 孩子. 有幾正? 我諗好似寶詠琴讚洪潮豐咁 "正" , "真係好正" 咁掛?! 加拿大 人來的, 有美貌有深度. 早前他已對我說: "ken, 我諗我找到了一個好女孩了. 以前的女孩子, 有美貌但無深度, 興趣又不同. 有 d 女仔同我好夾, 但, you know, (用手比劃了無身材的手勢)" 所以我想今次的對象很 perferct. 卒之, 經過上星期日的 (激情) 之後, 佢比人拋棄o左. 仲未知點解. 總之佢日日 email 比人, 人地都無覆佢. 所以見佢日日都係眼腫腫咁. 睇見都可憐. 星期一 佢比o左一首新寫的歌我聽, 叫做 "everything you are" 係幾悲的歌. 我諗今次 佢來真的. greg 都係一個好人來架, 熱情又肯幫人, 只是佢個人好似太瀟灑咁o掛. 希望佢 可以早日康復啦.

最近愛上了打捽碟機 beatmania 3rd mix. 學寶詠琴讚洪潮豐: "正" , "真係好 正", 好正呀", 我響度諗, 如果有 d　鋼琴係好似部機咁有燈閃布公仔睇, 我已 經係演奏級了. 其實響琴行都見過有閃燈教按琴鍵o架, 不過梗係好悶啦. 如果 唔係點會咁少人學 o丫!

20/01/99

感冒

聖誕節病倒了, 想不到而家又病. 雖然係小小感冒, 但都係唔好, 成日個人好似 無 mud 力咁, 做o野又慢, 無晒心機. 昨晚上了 sam 的家拿盒 "我和彊屍有個約 會" 錄影帶比 catherine, 見到佢個 17 吋大芒, 好鬼羨慕. 見到家中的 14吋 小芒, 個開關成日壞, 開唔到, 就於是拿起支鑼絲批拆開佢, 東整西插, 竟然比 我整番個開關! 佢都算好彩比我開左一刀攪點. 如果唔係第二日我搵一個好o野番 來就知, 實情比我打入冷宮!

昨天的天氣, 整天都有煙霞, 好似好淒美咁. 其實我知道呢 d　係塵來的. 索多兩 啖即刻喉嚨發炎都似! 大家都係小心 d.

隔離台馬生, 祝你個星記唔好發霉啦!

食飯時蟹榮打電話來, 講緊莊毅同莊櫃的分別時, 自己響度勁笑, 笑成分幾兩分鐘, 我叫佢不如冷靜 d 再打來啦. 原因係佢扮莊櫃講粗口, 自己都忍唔住笑...

17/01/99

寡佬Tonny 的末日~!

星期六 Tonny 結婚的日子, 好多老友做o左佢見證人, 見證寡佬Tonny 的末日. 當日佢因為感冒未清的原故, 個樣有少少病態, 相信佢都唔想的. 但係呢少少 既缺憾先會叫莊生莊太多一點記念性...

大清早七點鐘就要開始佈置花車. 但係因為天氣太寒冷, 我又等唔到車, 所以 遲左半粒鐘去到. 當時大家仍未佈置好花車, 我同 Baron 一齊將 D 蝴蝶結 放成心形, 貼在花車上, 真係幾鬼靚架! 好彩兩家人只係隔兩條街, 所以一切 都唔係太緊. 到 o左八點半, 我地一大班人浩浩蕩蕩步行到女家門口, 姊妹團竟然 要 tonny 響樓下掛往個結婚啟示牌, 叫 20 個街頭坊簽名見證! 都幾玩o野架! 於是我地咪一齊去叫行過的街坊簽名 lor. D 街坊以為係一週刊玩偷拍, 竟然 雞咁腳走, 激死! 有 d 街坊真係識佢地, 話恭喜晒!

上到樓, 我地一人屈食一舊神秘三文治. 一入口, 嘩! 唔係 wasabi , 而係一 陣薄荷味攻上鼻, 再加上又咸又甜的味一齊上, 真係想嘔. 班姊妹竟然做一份 牙膏三文治我地嘆! 真想死! 但係我本住做人兄弟, 幫新郎排除萬難奪得美人 歸, 無辨法啦.

姊妹們都幾靚架, 值得一讚! 晚上, 我地去到晚宴場地, 又要預備其他野啦. 當晚都幾豪華, 又有大射燈照住新人出場, 又有背景音樂, 真係世紀婚禮. tonny 結婚亦令我想到, 大家都咁大個人, 我地都唔係細個啦. 睇番 d 細路 相, 好似好耐之前咁. 但大家的友誼仍像昨天一樣, 個感覺好奇怪. 有 d 惘 然若失. 失既係大家青春期都過去了. 暗瘡都唔似以前咁狂生, 講野都唔再好 似以前咁可以咁不羈. 日後, 大家垂垂老矣, 坐在公園講等閒事, 我相信都 好驚嘆點解人生會咁匆匆. 我諗我都幾老餅, 雖然我地 d 青春期唔係點樣精彩 萬分, 但都係一段美好而值得珍惜的日子. 希望家下 d 青少年, 唔好糟蹋自己, 不然日後就想當年都唔得就慘啦.

15/01/99

朋友結婚了~!

明日16號就係我老友 tonny 結婚的日子, 我都戥佢好開心. 因為我認識tonny都有 12年了. 我地由中一第一日就識. 我仲記得, 係86年既9月1日. 當日班主任肥陳 話, 叫大家都介紹一下自己, 咁呢一個人就同大家話佢叫做莊毅, 我口痕, 就話 "江毅?!" (如果大家都認識一 d 甘草的話, 江毅呢一個名應該會聽過) 即時佢又 唔知搭左一句mud 野, 然後, 我地既 "純男性" 友誼就開始啦...

tonny 個人夠率直, 講野好坦白, 對朋友好好. 所以一向都有好多攪笑野, 可能 佢比我地大兩年的關係, 響中一己經響 "天台俱樂部" 同我地講, 佢睇中左一個 班中的一個女仔. "天台俱樂部" 係我, tonny 同蟹榮一次響佢天台食炒麵時開始 的. 只係好似維持了一兩次就因為 tonny 搬屋而解散了. 為左令vivian (tonny 嫂) 個心安樂d, 同埋受害者 (被暗戀者) 及我的人身安全, 以及tonny 唔使頂 痰罐之苦, 我唔會講出邊一個係受害者. 不過不可不題我地初中時代都真係不打 不相識. 我地打既係 snooker. 中一至中四, 真係暗無天日, 日日放學, 一定係 去浦波樓. 呀平陳作平, 楊江山, 潛雄, 岑步雪等都係因此而認識的.

好眼訓, 都係同馬程開場fifa99先訓...

剛剛比左個密碼比馬程, 佢話寫網頁日記都幾有趣. 期望佢會比 d 攪野內容大家 笑下啦. 如果朋友又想追加自己的日記上來, 問我就得啦! 講開馬程又係我個老 死, 有一張相係我地中一時響班房映的, 當時馬程仲你薯條仔, 而家成條竹咁. 真羨慕. 我都係竹, 但係果隻 d 節中間肥左o個 d 竹....你話慘唔慘!

聽講聽日係呢個星期最最最凍的一日. 我響度諗, vivian 如果著 d low cut婚紗, 唔凍到變 iceman 都唔得! 我仲要一早去到北角 tim!!! anyway, 祝 tonny 同vivian 白頭到老, 永結同心. 好, 而家補習啦, 馬程今晚等我 fifa 呀~!